Origine de l’initiative

Nan ane 2015, pou okazyon fèt Lachandeleur mwen menm ak kouzin mwen Junie te an Ayiti, li te di mwen ke Sandra Sanon ki se yon zanmi de long dat tap mande pou mwen. Yon ti tan aprè, mwen rankontre ak Sandra e lòt kompatriyòt ki te la tou pou okazyon fèt la. Nou te pwofite pase yon moman inoubliyab paske sa te fè plis ke 20 ane ke nou pat rankontre.

Lè mwen tounen NY mwen te poste anpil foto souvni sou Facebook. Reyaksyon yo te anpil, te gen plizyè moun ki te mande poukisa nou pat envite yo. Konsa gen moun ki te di pwochèn fwa pou n fè yo konnen pou yo k patisipe tou. Se apati de reyaksyon sa yo ki fè lide kreye yon gwoup ki k konekte tout pitit Gwo Mòn yo ni sa ki an Ayiti, ni sa ki a letranje, lide Gros-mornais Ann Pale ya vin jèmen nan tèt mwen.

Aprè kèk tantativ sou FB ki pat mache, 5 ane apre 10 Novanm 2019 apre mwen te konsilte plizyè fanmi ak zanmi tankou Markez Lacruz, Sandra Sanon, Saint Vil, Guerda Ponthieux, ak plizyè lòt moun, GMAP te pran nesans sou Whatsapp. Tou swit aprè anpil lot konpatriyòt te rejwenn nou sou gwoup WhatsApp la. Ansanm nou anbwase bèl lide sa epi bali estrikti li te bezwen. Sa ki pèmèt jodi a nou ap selebre 5eme anivese GMAP anpenpan.

Map pwofite okazyon sa pou mwen di yon gwo mèsi epi felisite tout moun ki travay, ki bay tan yo enèji yo, ki pataje konesans ak eksperyans yo pou fè tout sa nou reyalize deja yo pou fè Gwo Mòn avanse. Ansanm nap kontinye ekri listwa pou anpil lòt jenerasyon kap vini apre nou.

Gwo Mòn an avan pou nou tout.

Sèvitè nou e pitit Gwo Mòn.

Vernel Vilcean